ஒரு மாதமாக தொடரும் ஊரடங்கு - வாழ்வாதாரம் இல்லை : அளுத்மாவத்தை மக்கள் வீதியில் இறங்கி ஆர்ப்பாட்டம்..!

ஒரு மாதமாக தொடரும் ஊரடங்கு - வாழ்வாதாரம் இல்லை : அளுத்மாவத்தை மக்கள் வீதியில் இறங்கி ஆர்ப்பாட்டம்..!
கடந்த ஒரு மாத காலமாகத் தொடரும் தனிமைப்படுத்தல் ஊரடங்குச் சட்டத்தினால் தமது வாழ்வாரம் முழுமையாக இழக்கப்பட்டு விட்டதால், அரசாங்கம் தமக்கு நிவாரணம் வழங்க வேண்டும் எனக் கோரி மோதரை, இக்பாவத்தை பகுதி மக்கள் அளுத்மாவத்தை வீதியில் ஆர்பாட்டத்தை மேற்கொண்டுள்ளார்கள்.

இன்று காலை ஆரம்பமான இந்த ஆர்ப்பாட்டமானது தொடர்ந்து நடைபெற்றுக் கொண்டிருப்பதாக அப்பகுதியிலிருந்து கிடைக்கும் செய்திகள் தெரிவிக்கின்றன. 

எனினும், இப்பகுதிக்கு விரைந்த பொலிஸார் நிலைமைகளைக் கட்டுப்படுத்த முயன்றபோதிலும், அதிகளவு மக்கள் ஆர்ப்பாட்டத்தில் ஈடுபட்டதால் அங்கிருந்து வெளியேறிவிட்டார்கள்.

இது தொடர்பில் மேலும் தெரியவருகையில்.., 

தொடரும் ஊரடங்கால் தம்மால் தொழில் செய்ய முடியாதிருப்பதாகத் தெரிவித்த ஆர்ப்பாட்டக் காரர்கள், அரசாங்கத்தினால் வழங்கப்பட்ட 5,000 ரூபா நிவாரணம் தமது குடும்பத்தின் தேவைகளுக்குப் போதுமானதாக இல்லாமையால் தாம் பட்டிணி கிடக்கும் நிலை ஏற்பட்டுள்ளதாகவும் குறிப்பிட்டார்கள்.

அரசாங்கம் உடனடியாகத் தமக்கு நிவாரணம் வழங்க நடவடிக்கை எடுக்க வேண்டும் எனவும், சிறு குழந்தைகள், பெண்கள் வயோதிபர்கள் தொடரும் ஊரடங்கினால் பெரும் சிரமங்களை எதிர்நோக்கியிருப்பதாகவும் அவர்கள் தெரிவித்தார்கள். 

இது தொடர்பில் உரிய அதிகாரிகளின் கவனத்துக்குக் கொண்டு வருவதற்காகவே இந்த ஆர்ப்பாட்டத்தை நாம் நடத்துவதாகவும் அவர்கள் குறிப்பிட்டார்கள்.
ஆசிரியர் - Editor II